Gjatë periudhës së studimeve të doktoratës, studenti përpara paraqitjes në provimin e doktoratës, duhet:

• Të ketë realizuar, si autor i parë, së paku, tri referime ose paraqitje (poster) shkencore, nga të cilat dy referime ose paraqitje duhet të jenë mbajtur në veprimtari shkencore ndërkombëtare, në një vend të zhvilluar (simpozium, konferencë, kongres), të pranuara në bazë të një vlerësimi paraprak shkencor dhe të botuara në “Proceedings”, të indeksuara me kod ISBN-je. Lista e shteteve, në të cilat veprimtaritë shkencore ndërkombëtare dhe referimet e mbajtura ose paraqitjet (poster) shkencore do të njihen, miratohet me Urdhër të Ministrit të Arsimit dhe Shkencës, me propozim të Këshillit të Arsimit të Lartë dhe Shkencës (KALSH), Komisionit të Vlerësimit të titujve Akademikë dhe Konferencës së Rektorëve;
• Të ketë botuar, si autor i parë, së paku tre artikuj shkencorë në revista shkencore. Së paku dy prej artikujve duhet të jenë botuar ose pranuar për botim në revista shkencore të njohura të vendeve të zhvilluara sipas listës së miratuar me urdhër të Ministrit të Arsimit dhe Shkencës, me propozim të KALSH-it, KVTA-së dhe Konferencës së Rektorëve;
• Të ketë përgatitur dhe paraqitur në Këshillin e Profesorëve të fakultetit disertacionin, së bashku me një përmbledhje, të miratuara nga udhëheqësi shkencor. Struktura e disertacionit dhe e përmbledhjes së tij përcaktohen në rregulloren e studimeve të doktoratës;
• • Të ketë dhënë provimin e gjuhës angleze, mbi bazën e testeve të njohura ndërkombëtare, mbështetur në UDHËZIM NR. 14, DATË 28.3.2011 “Për njohjen e testimeve dhe certifikimeve për gjuhën angleze për programet e studimit të ciklit të dytë dhe të tretë në institucionet e arsimit të lartë”, Vendimit të Senatit Akademik të Universitetit të Tiranës nr.20 datë 21.05.2012 “Mbi testin e gjuhës angleze” dhe në zbatim te ligjit nr 80/2015 “ Për Arsimin e Lartë dhe Kërkimin Shkencor në institucionet e arsimit të lartë në RSH” i hyrë në fuqi me 06.10.2015, Neni 134, pika 1, specifikohet se studentët, të cilët kanë nisur programin e studimit të doktoratës para hyrjes në fuqi të këtij ligji, i përfundojnë ato sipas kritereve dhe modaliteteve të legjislacionit të kohës kur këta studentë janë pranuar. 

(VENDIM Nr. 593 , datë 18.08.2011 “Për disa ndryshime dhe shtesa në vendimin nr.864, datë 5.12.2007 të Këshillit të Ministrave “Për hapjen e programeve të studimeve të doktoratës në Institucionet Publike të Arsimit të Lartë dhe përcaktimin e kushteve, që duhet të plotësojë studenti për marrjen e diplomës për gradën shkencore “Doktor”, të ndryshuar.")