Objektivat dhe veprimtaritë formuese të programit të studimit

Objektivi kryesor i programit të studimit Bachelor në Informatikë Ekonomike është t’u japë studentëve njohuritë bazë formuese në fushën e bazave të të dhënave, programimit, multimedias, rrjetave kompjuterike, etj, me fokus kryesor formimin e specialistëve të informatikës së aplikuar në biznes dhe dhënien e mundësisë për realizimin e studimeve të avancuara në këtë fushë. Për realizimin e këtij objektivi programi parashikon studime në fusha të tilla bazë si gjuhët e programimit, arkitektura e kompjuterave, sistemet e operimit, algoritmikë, strukturë të dhënash, komunikim të dhënash dhe rrjetat kompjuterike, etj, të kombinuara me njohuritë në fusha të tjera si statistikë, ekonometri, matematikë e zbatuar në ekonomi, mikroekonomi, makroekonomi, etj.

Sistemi i njohurive që ofrohet nga ky program dhe kompetencat që përfitojnë studentët nëpërmjet tij, u mundësojnë atyre edhe ndjekjen e një karriere kërkimore apo akademike nëpërmjet vazhdimit të studimeve të ciklit të dytë, duke rritur kështu mundësinë e karrierës së tyre profesionale.

Veprimtaritë formuese:

1. Lëndë të formimit të përgjithshëm: Matematikë 1, Hyrje në Ekonomi, Matematikë 2, Mikroekonomi, Makroekonomi, Bazat e Statistikës, Statistikë e Zbatuar.

2. Lëndë të formimit karakterizues: Hyrje në Informatikë, Algoritmikë, Programim në C++, Multimedia, Strukturë të Dhënash, Arkitekturë Kompjuteri, Matematikë e Zbatuar, Programim në Java, Sisteme Shfrytëzimi, Komunikim të Dhënash dhe Rrjetat Kompjuterike, Ekonometri, Sisteme Informacioni në Menaxhim, Programim në Web, Teori e Bazave të të Dhënave

3. Lëndë integruese: Marketing, Menaxhim, Kontabilitet Financiar, Drejtim Financiar.

4. Lëndë me zgjedhje: Grafikët Kompjuterikë / Software Aplikativ / Siguria e Informacionit / Ndërveprimi Njeri - Kompjuter, Etikë Biznesi  /Inovacion.

5. Lëndë të formimit plotësues: Gjuhë e Huaj 1, Gjuhë e Huaj 2, Shkrim Akademik, Çështje Ligjore të Informatikës.

6. Praktika.

7. Mikroteza.

Skema e vlerësimit

Shkalla e përvetësimit të programit mësimor vlerësohet me sistem notash nga 1 në 10, ku notat kanë kuptimin e mëposhtëm: 1-4 mbetës, 5 mjaftueshëm, 6 kënaqshëm, 7-8 mirë, 9 shumë mirë, 10 shkëlqyer.

Mundësia për studime të mëtejshme

Studenti, i cili diplomohet në programin e studimit Bachelor në Informatikë Ekonomike pranohet të vazhdojë një program studimi të ciklit të dytë në fushat e Teknologjive të Informacionit dhe Komunikimit, por jo vetëm.

Mundësitë e punësimit dhe të kualifikimit profesional

Studenti, i cili zotëron një diplomë Bachelor në Informatikë Ekonomike mund të punësohet si specialist në sektorin e Teknologjisë së Informacionit por edhe si specialist në sektorin e Ekonomisë, në institucione të ndryshme publike dhe private, kompani që janë të orjentuara drejt Teknologjisë së Informacionit por jo vetëm, sistemin bankar, organizata të ndryshme kombëtare dhe ndërkombëtare, etj.